اسلام آباد۔10دسمبر (اے پی پی):وزیراعظم عمران خان آکھیے جو کورونا دی صورتحال دا بحیثیت قوم مقابلہ کرݨا ہے، ودھدی سردی دے نال کورونا وی زیادہ کھنڈݨ دا ݙر ہے، جلسے جلوس کرݨ آلے عوام دی جان خطرے اچ پیندے پئن، جلسے ݙو ترائے مہینے بعد وی تھی سڳدن ،جلسے جلوساں نال حکومت کوں کوئی فرق نہ پوسی ، پی ڈی ایم جلسیں دی وجہ توں ملتان اچ 64 اتے پشاور اچ 40 فیصد کورونا دے مریضاں کیتے ہسپتالاں اچ مختص بسترے بھریج ڳئن ، جݙاں ودھ لوک جمع تھیسن تاں کورونا تکھے کھنڈسی، عوام احتیاطی تدابیر اختیار کرے تے اپݨے آپ کوں کورونا توں بچاون ۔اے ڳالھ انھاں اتھاں خمیس کوں کورونا دی صورتحال متعلق قومی رابطہ کمیٹی دے اجلاس دے بعد میڈیا نال ڳالھ مھاڑ کریندے ہوئیں آکھی اے ۔ایں موقع تے وفاقی وزیر منصوبہ بندی، ترقی و اصلاحات اسد عمر، وفاقی وزیر اطلاعات و نشریات سینیٹر شبلی فراز، وزیراعظم دے معاون خصوصی صحت ڈاکٹر فیصل سلطان، وفاقی وزیر صنعت و پیداوار حماد اظہر، وزیراعظم دی معاون خصوصی تخفیف غربت و سماجی تحفظ ڈاکٹر ثانیہ نشتر وی موجود ہن۔ وزیراعظم عمران خان آکھیے جوکورونا دی ݙوجھی لہر اچ بحیثیت قوم رل تے احتیاطی تدابیر اختیار کرݨ دی لوڑھ اے ، اگر احتیاطی تدابیر اختیار نہ کیتیاں ڳیاں توں ہسپتالاں اچ کورونا دے مریضاں دی تعداد مزید ودھ ویسی تے اتھاں مزید مریضاں کیتے جاہ نہ رہسی ۔پورے ملک اچ اوسط 40 فیصد کورونا دے مریضاں کیتے بستر اتے وینٹی لیٹرز مریض آ چکن ، امریکہ، یورپ کوں جیویں صورتحال دا سامݨاں اے تے انھاں ݙے وسائل وی ودھ ہن، اگر اتھاں ہسپتال بھرے پئن تاں اساݙے کیتے حالات ٻہوں اوکھے تھی ویسن انھاں آکھیے جو اے او ویلھا اے پوری قوم رل تے احتیاط کرے ۔
