اسلام آباد۔10مارچ (اے پی پی) وزیراعظم دے معاون خصوصی برائے نیشنل ہیلتھ سروسز، ریگولیشنز اینڈ کورارڈینیشن ڈاکٹر فیصل سلطان آکھیا جو کورونا کیسز اچ ودھارے پاروں سینما ہائوسز، ان ڈور شادیاں اتے ریسٹورنٹس اچ پابندیاں برقرار رہسن، اسلام آباد اچ دفتر اچ پنڄاہ فیصد عملے دی حاضری دے فیصلے تے عمل جاری رہسی۔پارک وی شام چھی وڄے بند کر ݙتے ویسن۔ پوری قوم توں گزارش اے جو گھر توں ٻاہر ماسک ضرور پاون اتے کورونا ایس او پیز تے سختی نال عمل کرن۔ اے ڳالھیں انہاں بدھ کوں نیشنل کمانڈ اینڈ آپریشن سنٹر اچ اجلاس دے بعد وفاقی وزیر تعلیم تے پیشہ وارانہ تربیت شفقت محمود دے رلے میڈیا بریفنگ اچ آکھی۔ انہاں آکھیا جو ملک اچ کورونا وائرس دے کیسز ودھدے پئن اتے اساݙے ہیلتھ سسٹم تے دبائو ودھدا پئے جئیں پاروں کڄھ اہم فیصلے کیتے ڳئن۔ انہاں آکھیا جو پاکستان اچ سٹھ سال توں ودھ دے لوکاں کوں کورونا ویکیسن لاوݨ دا عمل شروع کر ݙتا ڳئے۔ انہاں ݙسیا جو ملک اچ شام چھی وڄے تفریحی پارک بند کرݨ دا فیصلہ کیتا ڳئے ۔ انہاں آکھیا جو سینما ہالز کوں پندرہ مارچ توں کھولݨ دا فیصلہ واپس ڳھن ڳھدا ڳئے اتے ہوٹلاں دے اندر کھاوݨ تے وی پابندی ہوسی جڈانجو شادی ہالز بارے وی پالیسی اونویں رہسی۔ انتظامی ادارے سمارٹ لاک ڈائون تے عمل کرن۔ گزریل ہفتے کورونا دے کیسز ودھ ڳئن۔
