اسلام آباد۔5اپریل (اے پی پی):صدر مملکت ڈاکٹر عارف علوی علما تے مشائخ تے زور ݙتے جو او رمضان المبارک دے دوران کورونا توں بچݨ کیتے مسیتاں تے امام بارگاہواں اچ ایس او پیز دے نفاذ کیتے قائدانہ کردار ادا کرن، خود ویکسین لواون تے لوکاں کوں وی ایندی ترغیب ݙیون، عوام کوں کورونا وائرس دی نویں قسم دی شدت بارے ݙساوݨ دی لوڑھ اے، ایں حوالے نال علما، میڈیا اتے سیاسی قیادت آگاہی پیغامات جاری کرن۔ اے ڳال انہاں رمضان المبارک اچ کورونا احتیاطی تدابیر بارے علما و مشائخ دے نال مشاورتی اجلاس دی صدارت کریندےہوئیں آکھی اے ۔ صدر مملکت کورونا وائرس اچ مبتلا تھیوݨ پاروں ویڈیو لنک دے ذریعے اجلاس دی صدارت کیتی۔ اجلاس اچ صوبہ پنجاب، سندھ، خیبرپختونخوا، بلوچستان، گلگت بلتستان اتے آزاد جموں و کشمیر دے علما و مشائخ شرکت کیتی ۔وفاقی وزیر مذہبی امور و بین المذاہب ہم آہنگی پیر نور الحق قادری اتے وزیراعظم دے معاون خصوصی نیشنل ہیلتھ سروسز وی ورچوئل اجلاس اچ شرکت کیتی ۔ایندے توں علاوہ گورنر پنجاب چوہدری محمد سرور، گورنر سندھ عمران اسماعیل، گورنر بلوچستان امان اللہ خان یاسین زئی، گورنر گلگت بلتستان راجہ جلال حسین مقپون، چیف سیکرٹری آزاد جموں و کشمیر اتے مختلف مکاتب فکر توں تعلق رکھݨ آلے علما اتے مشائخ وی اجلاس اچ شریک تھئے ۔
