مقبوضہ کشمیر دے عوام کوں کلھا نہ چھوڑیسوں ، انہاں دی اخلاقی، سیاسی اتے سفارتی حمایت جاری رکھیسوں ، صدر مملکت ڈاکٹر عارف علوی دا کشمیریاں دی غیر متزلزل حمایت دا اعادہ

اسلام آباد ۔ 14 اگست (اے پی پی) صدر مملکت ڈاکٹر عارف علوی کشمیریاں دی غیر متزلزل حمایت دا اعادہ کریندے ہوئیں آکھیے جو مقبوضہ کشمیر دے عوام کوں کلھا نہ چھوڑیسوں ، انہاں دی اخلاقی، سیاسی اتے سفارتی حمایت جاری رکھیسوں، پاکستان دی کامیاب سفارتکاری پاروں اقوام متحدہ دے سیکرٹری جنرل، انسانی حقوق دیاں عالمی تنظیماں، چین ، ترکی اتے سعودی عرب سمیت بئے دوست ملکاں مسئلہ کشمیر تے پاکستان دے موقف دی حمایت کیتی اے ، مسلح فوج اتے پاکستانی قوم دہشت گردی دا بہادری دے نال مقابلہ کیتے جیں تے انہاں کوں خراج تحسین پیش کرینداں ، افغانستان اچ امن کیتے امن معاہدہ اہم قدم اے ، پاکستان افغانستان اچ امن چاہندے ، سی پیک توں خطے اچ ترقی اتے خوشحالی دے نویں دوردا آغاز تھئے ، کورونا وبا دے باوجود پاکستان دے معاشی اشاریے مثبت رستے تے ٹردے پئن ، حکومت دیاں دانشمندانہ پالیسیاں اتے قوم دے تعاون نال کورونا وبا دے خلاف کامیابی ملی، گزریل ڈو سال دے دوران ھکومت تے قوم کرپشن دے خلاف علم بلند کیتا ۔اے گال انہاں 74 ویں یوم جشن آزادی دی مرکزی تقریب توں خطاب کریندے ہوئیں آکھی اے ۔ انہاں قوم کوں 74 ویں یوم آزادی دی مبارخ ڈتی۔ 23 مارچ 1940ءکوں مسلماناں قرار داد مقاصد پاس کیتی ۔ او ہک خواب ہئی جیں دی تکمیل 14 اگست 1947ءکوں تھئی ۔ پاکستان طویل جدوجہد دے بعد حاصل کیتا گیا جیں دے بعد تکمیل پاکستان کیتے ایں ملک حضرت محمد خاتم النبین ﷺ دی سنت، علامہ اقبال اتے قائد اعظم دے خواباں دے مطابق بنڑاونڑ دی جدوجہد شروع تھئی ۔اے جدوجہد اج وی جاری اے ۔ انہاں آکھیے جو ملک کوں وجود اچ وونڑ دے بعد بہوں سارے چیلنجز درپیش رہیے ۔ مسلح فوج تے قوم دہشت گردی دا بہادری دے نال مقابلہ کیتے جیں تے انہاں کوں خراج تحسین پیش کریندان ۔ ہنڑ وی27 لکھ افغان تارکین وطن پاکستان اچ موجود ہن جڈاں جو ڈوجھے پاسے مغربی ملکاں 100 لوکاں وی پناہ ڈیونڑ کیتے تیار کائنی ۔ انہاں آکھیے جو قوم قائداعظم محمد علی جناح دے فرمان اتحاد، تنظیم اتے ایمان تے عمل کیتے ۔ انتہا پسندی مکاونڑ کیتے قوم اتحاد دا مظاہرہ کیتے ۔ انہاں آکھیے جو بھارت دے پاکستان تے حملے دے جواب اچ پاکستان امن دا پیغام ڈتے ۔ پاکستانی حکومت ، قوم تے میڈیا وی امن دا پیغام ڈتا جڈاں جو بھارتی حکومت قوم تے میڈیا جنگ کوں ہوا ڈتی ۔انہاں آکھیے جو گزریل ڈو سال دے دوران موجودہ حکومت تے پوری قوم بدعنوانی دے خلاف آواز چاتی ۔ بدعنوانی دے خلاف اے جدوجہد جاری رہسی۔ انہاں آکھیے جو پاکستان سمیت پوری دنیا کورونا وبا توں متاثر تھئی۔ پوری دنیا اچ لاک ڈاون لاتا گیا لیکن وزیر اعظم عمران خان قوم دی فکر کریندے ہوئیں اساکوں اتنا سخت لاک ڈاﺅن نی کرسگدے جیں نال لوک بھک تے افلاس دا شکار تھیون ۔اے وزیر اعظم دا اپنڑے ملک دے عوام نال ہمدردی دا اظہار ہئی ۔انہاں آکھیے جو ملک تے قوم دے مفاد اچ اوکھے رستے کوں چنڑیا تے جیں تے وزیراعظم کوں خراج تحسین پیش کرینداں ۔انہاں آکھیے جو 5 اگست 2020ءکوں یوم استحصال دے طور تے منایا گیا۔ بھارت اچ اقلیتاں کوں نشانہ بنڑایا ویندا پئے ۔ بھارت اچ تفریق ودھدی پئی اے۔ گزریل سال اقوام متحدہ دی سلامتی کونسل اچ مسئلہ کشمیر ول ول چاتا گئے تے پاکستان دی خارجہ پالیسی دا عکاس اے ۔انہاں آکھیے جو کشمیری بھراواں کوں کلھا نہ چھوڑیسوں ،وزیراعظم عمران خان کشمیر دے سفیر ہن ۔ چین، ترکی، سعودی اتے عرب او آئی سی سمیت بئے ملکاں دا مسئلہ کشمیر تے پاکستان موقف دی حمایت تے شکر گزار آں ۔ پاکستان ولوں نویں نقشے دا اجرا اہم قدم اے ۔انہاں آکھیے جو تریمتاں وراثتی حقوق دی فراہمی کیتے قرآنی آیات دا حوالہ ڈینڈے ہوئیں آکھیے جو تریمت دا اساڈے معاشرے اچ وڈا مقام اے ۔اگر تریمتاں کوں سارے شعبیں اچ برابر دے حقوق ملن توں ملکی ترقی اچ اہم کردار ادا کرسگدین ۔ تقریب اچ چیئرمین سینیٹ محمدصادق سنجرانی، سپیکر قومی اسمبلی اسد قیصر، صدر ڈاکٹر عارف علوی دی ذال بیگم ثمینہ علوی، ترائی مسلح فوج دے سربراہ ، وفاقی وزرائ، معاونین خصوصی، اراکین اسمبلی اتے نمایاں شخصیات شرکت کیتی۔ تقریب اچ برزگ حریت رہنما سید علی شاہ گیلانی کوں ملک دا ساریں توں وڈا سول ایوارڈ نشان پاکستان عطا کیتا گیا ۔ صدر مملکت ڈاکٹر عارف علوی انہاں کوں اے اعزاز انہاں دی آزادی کیتے بے مثال جدوجہد تے ڈتے ۔ کل جماعتی حریت کانفرنس دے رہنماواں سید علی گیلانی کیتے ایوارڈ وصول کیتا۔ ایندے توں پہلے صدر مملکت ایوان صدر اچ ساوا پرچم لہرایا ۔