وفاقی وزیر اطلاعات و نشریات سینیٹر شبلی فرازدی وفاقی کابینہ دے اجلاس دے فیصلیں بارے میڈیا کوں بریفنگ

وفاقی کابینہ مختلف اداریں دے سربراہیں دی تعیناتی کیتے متعلقہ قواعد و ضوابط اچ تبدیلی دا فیصلہ کیتے، وزیراعظم 12وزارتاں اچ خلاف ضابطہ تعیناتیاں دی رپورٹ دا سخت نوٹس گھندے ہوئیں بیاں وزارتاں توں وی ہک ہفتے دے اندر رپورٹ منگ گھدی اے
اسلام آباد ۔ 12 مئی (اے پی پی) وفاقی وزیر اطلاعات و نشریات سینیٹر شبلی فراز آکھیے جو وفاقی کابینہ انتخابی عمل اچ شفافیت کیتے اصلاحات دی تجویز دی تعریف کریندے ہوئیں مختلف اداریں دے سربراہیں دی تعیناتی کیتے متعلقہ قواعد وضوابط اچ تبدیلی دا فیصلہ کیتے وزیراعظم 12وزارتاں اچ خلاف ضابطہ تعیناتیاں دی رپورٹ دا سخت نوٹس گھندے ہوئیں بیاں وزارتاں توں وی ہک ہفتے دے اندر رپورٹ منگ گھدی اے ،وزیراعظم عمران خان دی سوچ دا محور ملک دے غریب اتے کمزور طبقات دی فلاح اے،لاک ڈاﺅن اچ نرمی وی ایں سوچ دی عکاس اے اساکوں لوکاں دی صحت دی حفاظت دے نال نال انہاں دے معاشی تحفظ کوں وی یقینی بنڑاونڑاں اے ۔ منگل کوں وفاقی کابینہ دے اجلاس دے فیصلیں بارے میڈیا کوں بریفنگ ڈیندے ہوئٰن انہاں آکھیے جو کابینہ اجلاس دا ایجنڈا 7نکاتی ہئی ، کابینہ اجلاس اچ انتخابی اصلاحات کیتے 39 تجویزاں پیش کیتیاں گئیاں،اے تجاویز اعظم سواتی پارلیمانی امور دے وزیر دی حیثیت نال تیار کیتن ۔ شبلی فراز آکھیے جو وزیراعظم عمران خان انہاں تجویزاں دی تعریف کیتی اے ۔انہاں اچ انتخابی نتائج دی وختی ترسیل و اعلان، سیاسی جماعتاں ولوں انتخابات توں چار مہینے پہلے الیکشن کوں حتمی شکل ڈیونڑ ، حلقہ بندیان دے ویلھے امیدواراں دے پولنگ ایجنٹس دی تعداد، انتخابی خرچے ، باہرلے ملک پاکستانیاں دے ووٹ متعلق تجویزاں شامل ہن ۔انہاں آکھیے جو پی ٹی آئی دی واحد سیاسی حکومت اے جیرھی جو انتخابی عمل اتے نتیجے کوں مکمل شفاف بنڑاونڑ چاہندی اے ، انتخابی عمل اچ موجود خامیاں کوں ہٹا تے اینکوں شفاف تے منصفانہ بنڑاونڑ حکومت دی ترجیح اے تاں جو عوام دا اعتماد ودھے ۔ وزیر اطلاعات آکھیے جو اجلاس اچ کابینہ کمیٹی برائے توانائی دے فیصلیں دی توثیق کیتی گی اے ، وزیراعظم توانائی دے شعبے دے ملکی معیشت اتے ترقی اچ کلیدی کردار دے پیش نظر سستی بجلی، گردشی قرضیں اچ گھٹکی، پیداواری پلانٹس، بجلی دی وزارت اتے بئے متلعقہ اداریں اچ اصلاحات دی ضرورت تے زور ڈتا ۔ انہاں آکھیے جو کابینہ اقتصادی رابطہ کمیٹی دے 6 مئی دے اجلاس دے فیصلیں دی توثیق کیتی اے ۔سینیٹر شبلی فراز آکھیے جو اجلاس اچ وزیراعظم کپاہ دی امدادی قیمت دے تعین کیتے اقدامات دی ہدایت کیتی ،کپاہ دی ملکی برآمدی شعبہ کیتے ودھ ساری اہمیت پاروں پیداوار تے معیار ودھاونڑ دی حوصلہ افزائی تے مبنی اقدامات دی جرورت تے زور ڈتا ۔انہاں آکھیے جو کابینہ نیشنل کمیشن سٹیٹس آف وومن دے ارکان دے ناواں دی منظوری دے نال نال ادارہ برائے شماریات تے مختلف محکمیں اچ اہم تعیناتیاں دی وی منظوری ڈتی اے۔ کابینہ مختلف اداریں دے سربراہیں دی تعیناتی کیتے متعلقہ قواعد و ضوابط دا فیصلہ کیتے ۔ایں مقصد کیتے ڈاکٹر عشرت حسین دی سربراہی اچ کمیٹی قائم کیتی گئی اے جیرھی جو ہک ہفتے اچ سفارشات پیش کریسی ۔ سینیٹر شبلی فراز آکھیے جو کابینہ کوں ڈسایا گئے جو 12وزارتاں اچ خلاف ضابطہ تعیناتیاں کیتیاں گئن ، وزیراعظم رپورٹ دا سخت نوٹس گھندے ہوئیں مزید وزارتاں توں وی ہک ہفتے دے اندر اعداد شمار منگ گھدن جیں دی روشنی اچ کاروائی کیتی ویسی ۔ وزیر اطلاعات آکھیے جو کابینہ کوں ملک اچ کورونا دی صورت حال تے ایندے نال نبڑنڑ کیتے اقدامات بارے ڈسایا گیا ۔انہاں آکھیے جو لاک ڈاﺅن اچ نرمی دے نال وڈی تعداد اچ لوک باہر نکل آئن عوام کوں لاک ڈان اچ نرمی دے دوران حفاظتی اقدامات تے سختی نال عمل کرنڑاں ہوسی ۔ ہک سوال دے جواب اچ سینیٹر شبلی فراز آکھیے جو وزیراعظم کورونا اتے بئے چیلنجز نال نبڑنڑ کیتے اپنڑیاں گونا گوں مصروفیات دے باوجود قومی اسمبلی اجلاس اچ شرکت کریسن لیکن ڈوجھے پاسوں اجلاس کیتے ریکوزیشن جمع کراونڑ آلیں بئے ممبران دی صحت خطرے اچ پاتے خود اسمبلی دے اجلاس اچ شرکت کائنی کیتی ۔ عوام انہاں دے دوغلے پن توں چنگی طرح واقف اے ۔انہاں مزید آکھیا جو آئینی ترمیم کیتے کہیں وی پارٹی دے تعداد ہوئی تاں جروری تھی ویسی ۔اے ہر ممبر دا حق اے جو او ترمیم تجویز کر سگدے۔ وفاقی وزیر آکھیے جو اساڈی حکومت نتیجے دی پروا کیتے بغیر اٹا تے کھنڈ دے معاملات دیاں انکوائریاں شروع کیتن ۔انہاں آکھیے جو حکومت کوں ایں ویلھے کورونا دا وڈا چیلنج درپیش اے ، کورونا وباءدا خطرہ حالی کائنی مکیا اساکوں ہک ڈوجھے کوں بچاونڑاں اے ۔وفاقی وزیر آکھیا جو عمران خان دی سوچ دا محور ملک دے غریب عوام تے کمزور طبقات دی فلاح اے ۔ احساس ایمرجنسی کیش پروگرام دے تحت 95ارب ونڈیے گئن ۔اساکوں لوکاں دی صحت دی حفاظت دے نال نال معاشی تحفظ کوں وی یقینی بنڑاونڑاں اے۔